Personsuodjalusa ja anonymavuođa birra
Norsk
English
Sámi
Go galledat Detfinneshjelp.no gieđahallojuvvojit du persondieđut gustojeaddji personsuodjaluslága ja dearvvašvuođalága mielde. Mii váldit duođas mo du persondieđut gieđahallojuvvojit
ja álo bargat dan ovdii vai sihkkarastit dieđuid maid mii gieđahallat du birra Detfinneshjelp.no:s.
Oslo universitehtabuohcciviessu HF:s (OUS) lea diehtoovddasvástádus Detfinneshjelp.no:s ja vuosttašceahkkefálaldagas Gávdno veahkki. Loga eanet personsuodjalusa birra OUS neahttasiidduin.
Čálašeapmi
Go válddát oktavuođa bálvalusain čálašeami bokte de válljet ieš makkár dieđuid almmuhat. Čálašan-ságastallan krypterejuvvo ja vurkejuvvo dušše oanehaččat geavaheaddji ja ráđđeaddi neahttalohkkái nu guhká go čálašeapmi bistá. Čálašan-ságastallan sihkkojuvvo dakkaviđe go ságastallan lea loahpahuvvon. Geavaheaddjis lea maid vejolašvuohta sihkkut dan maid lea čállán ovdalaš ságastallamis ja joatkit čálašeami.
IP-čujuhus ja áigemuddu goas čálašeapmi álggahuvvo sestojuvvo dattege 7 beaivvi, ja sihkkojuvvo dasto automáhtalaččat. Geahča sierra teakstaoasi jávohisvuođageaskku ja heađuštangeatnegasvuođa birra jus háliidat lohkat eanet IP-čujuhusa vurkema birra.
Miehtan vurket dieđuid
Čálašeami-ságastallamis sáhttá geavvat nu ahte ráđđeaddi jearrá mieđatgo dasa ahte mii vurket dieđuid ságastallamis sierra dokumentii (Triage). Lea áibbas eaktodáhtolaš ja jus it mieđa de ii váikkut dat du vejolašvuhtii oažžut rávvagiid dahje diimmu dikšui. Dieđut geavahuvvojit buoridit bálvalusa kvaliteahta ja dutkamii.
7 beaivvi maŋŋá sihkkojuvvo IP-čujuhus, ja vurkejuvvon dieđut leat dan rájes áibbas anonyma. Dan rájes ii leat vejolaš guorrat dieđuid ruovttoluotta dutnje.
Diibmodiŋgojupmi
Jus háliidat diŋgot diimmu dikšui poliklinihkas, fertet muitalit nama ja persovdnanummara. Mii fertet bivdit dan vai sáhttit fállat dutnje dearvvašvuođaveahki. Jus it háliit almmuhit dáid dieđuid čálašeami bokte, sáhtát riŋget diŋgot diimmu. Jus jo leat čálašeame, sáhtát addit dieđu ráđđeaddái geainna čálašat ahte háliidat riŋget vai dat seamma ráđđeaddi sáhttá vástidit telefovnna. Telefovdnaságastallamat eai báddejuvvo.
Namma ja persovdnanummar devdojuvvo Dearvvašvuođadoaimmahaga pasieantajournálavuogádahkii, doppe ásahuvvo čujuhus ja diibmodiŋgojupmi. Dieđut du birra gieđahallojuvvojit garra jávohisvuođageaskkuin.
Divššárii sáhttá leat ávkkálaš diehtit veahá eanet du birra ovdal boađát diibmui. Danne jerrojuvvot háliidatgo ahte dihto dieđut ságastallamis biddjojuvvojit čujuhussii. Lea áibbas eaktodáhtolaš ja jus it mieđa de ii váikkut dat du vejolašvuhtii oažžut diimmu dikšui.
Jávohisvuođageasku ja dieđihan- ja heađuštangeatnegasvuohta
Sii geat bargetGávdno veahkki bálvalusas leat dearvvašvuođabargit, ja sis lea jávohisvuođageasku. Jávohisvuođageasku mearkkaša ahte sii galget suddjet du personsuodjalusa. Seammás lea sis dieđihan- ja heađuštangeatnegasvuohta. Praktihkalaččat mearkkaša dat ahte sii leat geatnegahtton dieđihit heahtebálvalusaide jus sii oaivvildit ahte sus geainna sii ságastallet lea riska vahágahttit iežas dahje earáid dahje ahte son boahtá čađahit dihto duođalaš ráŋggáštahtti daguid, nu mo seksuála illasteami mánáid vuostá. Jus politiijat ožžot mis dieđáhusa, de sii muhtin dilálašvuođain gurret IP-čujuhusa heađuštan dihte ráŋggáštahtti daguid mat sáhttet leat várran heggii dahje dearvvašvuhtii.
Dearvvašvuođabargiin Gávdno veahkki bálvalusain lea vástideaddji geatnegasvuohta dieđihit mánáidsuodjalusbálvalussii.
Detfinneshjelp.no neahttasiiddu birra
Dearvvašvuođadirektoráhtta gieđahallá dieđuid ja lágida Detfinneshjelp.no, čálašeami ja Triage, ja das lea šiehtadus vuollelágideddjiin jođihit bálvalusa.
Detfinneshjelp.no geavaha diehtočoahkuid (cookie) identifiseret luohtehahtti neahttajohtolaga ja suddjet siiddu fallehemiid vuostá. Dat lea dárbbašlaš jođihan dihte neahttasiiddu, ja gieđahallojuvvo personsuodjalusgohččuma artihkal 6. nr. 1 f. vuođul. Diehtočoahkut sihkkojuvvojit ovtta jagi maŋŋá.
Detfinneshjelp.no vurke neahttasiiddu johtolaga/galledanstatistihka. Statistihkka čájeha man dávjá neahttasiidu galleduvvo. Guorranreaiddut eai geavahuvvo ja dieđut eai juogaduvvo olggobealde oasálaččaide. Dieđut IP-čujuhusaid birra anonymiserejuvvojit 14 beaivvi maŋŋá.
Dikšofálaldaga birra
Gávdno veahkki dikšofálaldagas lea individuála ságastallanterapiija psykologain dahje psykiáhteriin. Dikšu čađahuvvo ovtta min poliklinihkain.
Fálaldat lea dutnje gii leat badjel 18 jagi, geas lea seksuála beroštupmi mánáide, itge háliit čađahit daguid dan vuođul. Mii diehtit ahte olusat vásihit ahte lea váttis eallit buori eallima go lea dakkár beroštupmi.
Don deaivvadat divššáriiguin geain lea gelbbolašvuohta justa dán fáttás, ja geat háliidit bargat dáinna pasieantajoavkkuin. Divššárat dihtet ahte pasieanttat geain lea seksuála beroštupmi mánáide dábálaččat eai daga maidige iežaset jurdagiid vuođul.
Dikšu váldá ovdan du individuála dárbbuid ja dikšu heivehuvvo dutnje – sihke dan dáfus mii divššu sisdoallu lea, man dávjá don dárbbašat divššu ja man guhká. Divššu ulbmil lea nannet du eallinkvaliteahta ja iešheanalašvuođa, ja seammás eastadit seksuála illastemiid mánáid vuostá.
Dutnje fállojuvvo čuovvuleapmi go dikšu lea loahpahuvvon, jus don háliidat dan.
2020 rájes fállojuvvo dikšu Oslo Universitehtabuohcciviesus Lulli-nuorta Dearvvašvuođas (Helse Sør-Øst) ja Stavanger Dearvvašvuođas (Helse Stavanger) ja Bergen Dearvvasvuođas Oarji Dearvvašvuođas (Helse Bergen, Helse Vest). Dát golbma dearvvašvuođadoaimmahaga fállet divššu olbmuide miehtá riikka dassážii go 2021:s maiddái ásahuvvo dikšofálaldat Gaska-Norgga Dearvvašvuhtii ja Davvi-Dearvvašvuhtii.
Háliidatgo diehtit eanet dan birra mo dikšu čađahuvvo?
Leatgo dus seksuála jurdagat mánáid birra? Váldde minguin oktavuođa, de mii veahkehat du sirret jurdagiid, dahje diŋgo divššu dál.
