Manne lean mun ná?

Norsk
English
Sámi

Rávisolbmot geain leat seksuála dovddut mánáide lea fenomena mii álo lea gávdnon ja measta buot kultuvrrain.

Muhtimat geat ožžot seksuála himuid mánáide, muitalit ahte sidjiide leat mánát leamaš geasuheaddjin olles eallima. Danne go dát lea nu guhká bistán, de sii vásihit ahte sii leat riegádan dáinna geasuhemiin. Dat orru dego oassin sin seksuála identitehtas.

Muhtimat dovdet ahte sii ovttas mánáiguin sáhttet leat sii ieža, sii vásihit searvevuođa mii lea earálágan ja nannosat go maid vásihit iežaset ahkásaččaiguin, rávisolbmuiguin.

Mis ii leat vel doarvái máhttu sihkkarit dadjat manne muhtin olbmot vásihit ahte sii geasuhuvvojit seksuálalaččat mánáide. Dutkan orru čájeheame ahte sivvan dasa sáhttet leat máŋga sivvadilálašvuođa oktiibuot. Muhto mii diehtit ahte nu mo eanaš eará dovddut, leat maiddái min seksuála dovddut hábmejuvvon daid vásáhusaid vuođul mat mis ovdal leat leamaš eallimis.

Ovdamearkan ovdalis vásáhusain sáhttá leat go mánát leat vásihan seksuála illasteami dahje eará dáhpáhusaid bajásšaddamis mat leat sin garrasit loavkašuhttán. Soapmásiin lea rávisolbmo agis stuorát riska illastit mánáid seksuálalaččat.

Mii sáhttit stivret iežamet daguid

Seksuála dovddut ja seksuála geasuheapmi leat nu mo eará dovddut juoga mat sáhttet bohciidit ja jávkat. Dat sáhttet ihtit vuorddekeahttá impulsan ja dagahit ahte mii dahkat juoga maid eat lean plánen, dahje man eat rievtti mielde háliidan, dahkat.

Dat mii lea oktasaš buot dovdduide lea ahte mii eat sáhte stivret ahte dat bohciidit. Muhto mii sáhttit eallit dainna dakkár vuogi mielde ahte eat leat earáide riskan, seammás go mii sáhttit eallit buori eallima. Dása sáhtát don oažžut veahki Gávdno veahkki divššu bokte.

Jus dovddat ráfehisvuođa iežat jurdagiid ektui mánáid birra, de sáhtát minguin váldit oktavuođa. Mii sáhttit du veahkehit sirret jurdagiid.